Палестина Газа секторындағы соққылардан 1537 адам қаза тапқанын хабарлады
Израильдің Газа секторына жасаған соққыларынан қаза тапқандар саны 1537-ге жетті, 6 мыңнан астам адам жарақат алды, деп хабарлады sputnik.kz"Израильдің Газа секторындағы агрессиясы салдарынан 1537 адам қаза тауып, 6612 адам жарақат алды", - делінген хабарламада.
Сенбі, 7 қазан күні палестиналық Хамас қозғалысының әскерилері Газа секторынан Израильге зымыранмен шабуыл жасады. Бұған жауап ретінде Израиль қорғаныс күштері Газа секторында "Темір қылыш" операциясын бастады.
Сондай-ақ Израиль Газа секторына су, азық-түлік, электр қуаты, дәрі-дәрмек және отын жеткізу тоқтатылғанын жариялады.
Екі жақтан да мыңнан астам бейбіт тұрғын қаза тауып, бірнеше мың израильдік пен палестиналық жараланған. Түрлі ақпарат көздеріне сәйкес, 150-ге жуық израильдік Хамастың тұтқынында болуы мүмкін.
Қазақстан азаматтары 10 қазанда Air Astana әуе компаниясының арнайы рейсімен Израильден эвакуацияланды.
